सिद्धार्थ राजमार्गअन्तर्गत राम्दीदेखि वर्तुङसम्मको २६ किलोमिटर बढी दुर्घटना

पाल्पा, माघ २४ - पोखराबाट भैरहवातर्फ गइरहेको रात्रिबस बिहीबार बिहान सिद्धार्थ राजमार्गको चिदीपानी-२ मा दुर्घटना भयो । दुर्घटनास्थल भालुखोलामा एउटा मोबाइल बज्यो । झिसमिसेमै बजेको मोबाइल उद्धारमा गएका प्रहरीले उठाए । फोन गर्नेेले सोध्यो- 'कता आइपुग्यौ ?' जवाफमा प्रहरीले बस दुर्घटनामा परेको र आफू उद्धारमा आएको बताए । दुर्घटनामा परी मृत्यु भएका राम ओलीको मोबाइलमा आएको त्यो फोन गर्नेले सुनाए- 'घरमा बिरामी बुबाको मृत्यु भयो ।' तर त्यो खबर सुन्नुअघि नै २२ वर्षका छोरा राम यो संसारबाट बिदा भइसकेका थिए । उद्धारमा खटिएका प्रहरीले ओली परिवारलाई उल्टै जानकारी गराए- 'दुर्घटनामा परेर छोरा रामको मृत्यु भयो ।' बस भीरबाट करिब ४ सय मिटर तल खस्दा रामसहित १४ जनाको मृत्यु भएको छ । तीमध्ये १२ जनाको घटनास्थलमै र दुईको लुम्बिनी मेडिकल कलेजमा मृत्यु भएको हो । घटनामा ७ जना घाइते छन् । लु१ख ४९२४ नम्बरको बस सडकबाट ४ सय मिटर तल भालु खोलामा खसेको थियो । दुर्घटनामा चालक मुझुङ पाल्पाका रोमनसिंह सारू मगर र गाडी मालिक भिमगिठे बाग्लुङका मोहन केसीका साथै गुल्मी सिमीचौरका डिनबहादुर बस्नेत, मरवाङ रुकुमका राजबहादुर गुरुङ, ठुलीपोखरी पर्वतका बाबुराम आचार्य र विराटनगरका गोपाल ढकालको मृत्यु भएको छ । मगरागडी बर्दियाका विराटसिंह ठकुरी, भरतपोखरी कास्कीका बुद्धिबहादुर विक, मेहलपोखरी गुल्मीका गिरिराज भट्टराई र खौलालाकुरी पर्वतका ठाकुर सुनारको पनि मृत्यु भएको जिल्ला प्रहरी प्रमुख शिवकुमार श्रेष्ठले बताए ।

 अर्का एक पुरुषको परिचय खुलेको छैन । घाइते ७ मध्ये चारको तानसेन मिसन अस्पताल र तीनको लुम्बिनी मेडिकल कलेजमा उपचार भइरहेको छ । मिसनमा स्याङ्जा चिन्नेवासका डोलबहादुर राना, बर्दिया मंगलामाडीका कमला ठकुरी, रुकुम मरवाङका नरबहादुर बुढामगर, बाग्लुङ भकुन्डेका सूर्य खत्रीको उपचार भइरहेको छ । लुम्बिनी मेडिकल कलेजमा स्याङ्जा पुतलीबजारका दीपक कुँवर, कास्की न्युरोडकी चन्दा ओली र रूपन्देहीका राममन्दिर बुटवलका प्रदीप केसरीको उपचार भइरहेको अस्पतालले जनाएको छ ।

उकालो बाटोमा चालक निदाएकाले दुर्घटना भएको हुन सक्ने प्रहरी र घाइतेको अनुमान छ । दुर्घटनालगत्तै उद्धार थालिए पनि ठूलो भीरबाट गाडी खसेकाले निकै कठिनाइ भएको थियो । राजमार्गको सडकबाट झन्डै ४ सय मिटर तल खसेको बसका घाइतेमध्ये केही भीरमै अड्किएका थिए भने कोही तल खोलामा पुगेका थिए । 'उद्धारमा निकै कठिनाइ भयो । रातिका बेला, अँध्यारो, भीर, पहाड भएकाले झनै समस्या भयो,' घटनस्थलमै उद्धारमा खटिएका प्रहरी निरीक्षक कृष्णप्रसाद सापकोटाले भने, 'हामीसँग सानो टर्चलाइट मात्र थियो । कतिबेला आफैं लडिने हो कि भन्ने डर भयो ।

' उनका अनुसार नेपाली सेना, प्रहरी र सशस्त्रले उद्धार गरेका थिए । स्थानीयले सुरुमा उद्धार गरे पनि पछि कोही पनि -ल र्झन सकेनन् । पछि प्रहरी र सेनाले डोरी बाँधेर उद्धार गर्नुपरेको थियो । बाटो अप्ठ्यारो भएकाले उद्धारमा झन्डै ७ घन्टा लागेको थियो । भीरमा अड्किएका शव पनि डोरीले बाँधेर झार्नुपरेको सापकोटाले बताए । सिद्धार्थ राजमार्गअन्तर्गत राम्दीदेखि वर्तुङसम्मको २६ किलोमिटर बढी दुर्घटना हुने क्षेत्र हो ।

यहाँ ओरालो र घुम्ती बाटो छ । २०६९ फागुन २० गतै चिदीपानी २ कै धैरेनीमा भएको बस दुर्घटनामा १७ जनाको मृत्यु भएको थियो । त्यसअघिको अर्को बस दुर्घटनामा ३१ जनाको मृत्यु भएको थियो । बस दुर्घटना भएको स्थलमा रहेका चारवटा प्याराफिट भत्किएको छ । राजमार्गको तानसेन-राम्दी सडक खण्डमा अधिकांश प्याराफिट जीर्ण छन् । तिनको मर्मत भएको छैन । साना सवारीसमेत थेग्न नसक्ने अवस्था छ ।

 'झ्यालबाट खसेछु’ चन्दा ओली (२८) घाइते यात्रु मगरागडी, ९ बर्दिया

 ............................

 बर्दिया घर भए पनि म पोखरामा एमबीएस पढ्छु । बर्दिया, मगरागाडी ९ स्थित घरमा बाबा निकै बिरामी हुनुहुन्छ भन्ने खबर आयो । म, दिदी (कमला ठकुरी) भाइ (राम ओली) र दिदीको छोरा (विराट ठकुरी) ले भैरहवा जाने बसको टिकट लियौं । गाडी पोखराबाट ८ बजेपछि हिँडेको थियो । स्याङ्जाको गल्याङ बजारमा ल्याएर खाना खुवायो । खाना खाएपछि पनि दुई घन्टाभन्दा बढी समय बस रोकेको थियो । हामीले छिटो जाऔं बर्दिया जाने गाडी भेटिन्न भन्यौं । तर, निकै ढिला गरी हिँडे । गाडी मालिक, चालक दुवै उस्तै उमेरका जस्ता देखिन्थे । रमाइलो गर्दै हिँडेका थिए ।

तर, हामी निदाएछौं । एकैपटक राजमार्गको प्याराफिट हान्दा थाहा पाएकी थिएँ । दिदी (कमला ठकुरी) निकै चिच्चाउनु भयो । म पनि चिच्याएँ । सँगै बसेका थियौं । गाडी दुई पटक पल्टिएपछि अनि बल्ल थाहा भयो । म झ्यालको सिसाबाट खसेछु ।

अनि बाहिर फालिएछु भन्ने भयो । अँध्यारो थियो । गाडी धेरै तल बजारिन पुगेको थाहा पाएँ । हामीसँगै आएकाहरू कता-कता चिच्याएको आवाज आएको थियो । त्यही बेला म पनि कराएछु । पछि आएको हो वा सँगै ओभरटेक गर्दाको हो, एउटा ट्रकका चालक र हेल्परले सहयोग गरे म घसि्रँदै माथि आउँदै थिएँ । '

हामी आउन सक्ने अवस्था छैन, बुटा समाउँदै आऊ' भने । अनि मलाई ट्रकमा राखेर अस्पताल ल्याए । ट्रकका कसैले पनि केही कुरा गरेनन् । म होसमै छु भनेर उनीहरू नबोलेको जस्तो लाग्यो । ट्रकलाई ओभरटेक गर्न लाग्दा खसेको जस्तो मलाई शंका लागेको छ । तर, कसरी दुर्घटना भयो ठ्याक्कै भन्न सक्दिनँ । मेरो टाउको र छातीमा चोट लागेको छ ।